“Huma kemm huma l-wegħdi t’Alla, fi Kristu hemm l-‘Iva’ tagħhom. Konsegwentement ukoll permezz tiegħu l-‘Ammen’ tingħad minna għall-glorja t’Alla. Issa hu Alla li jistabbilina flimkien magħkom fi Kristu, u unzjonana, li wkoll issiġillana, u tana l-Ispirtu tiegħu fi qlubna bħala kapparra. Jien insejjaħ ’l Alla bħala xhud għal ruħi, illi biex niffrankahielkom ma ġejtx iżjed f’Korintu. Mhux għax niddominaw fuq il-fidi tagħkom, iżda aħna kollaboraturi magħkom għall-ferħ tagħkom, għax huwa bil-fidi illi tinsabu weqfin fermi” (2 Korintin 1:20-24).
Alla tana għotja kontra għotja. Waħda minnhom hi l-unzjoni tiegħu. Ikkonsagrana, jew litteralment ‘unzjonana,’ ċoè, sawwab iż-żejt fuq ir-ras, bħala sinjal ta’ sejħa u tisħiħ divin. Bħalma Alla unzjona lil Ġesù għal servizz u ministeru partikolari, hekk ukoll unzjona lilna għall-ministeri tagħna, mhux biż-żejt, imma bil-qawwa tal-Ispirtu.
Għotja oħra relatata hija l-issiġillar tal-Ispirtu. Siġill uffiċjali jindika awtorità u pussess. Jiggarantixxi ħarsien u protezzjoni. Alla ssiġillana (għamilna tiegħu b’garanzija u sirna proprjetà tiegħu) mhux b’siġill tax-xamgħa jew l-inċira, imma bl-Ispirtu s-Santu fi qlubna. Din l-għotja, dan l-att divin iseħħ fir-ruħ darba għal dejjem meta nsiru wliedu, eżattament meta jagħtina l-Ispirtu tiegħu, ċoè appena nafdaw f’Ibnu għall-ġustifikazzjoni tagħna.
Tana wkoll ir-rahan tal-Ispirtu. Uriena s-serjetà ta’ ħsiebu billi tana depożitu jew kapparra. Il-kapparra hi parti mill-ħlas totali, li jiggarantixxi li se jsir il-pagament kollu.
Bl-Ispirtu s-Santu fina Alla jwegħidna u jagħtina garanzija li s-salvazzjoni kompluta għad ċertament tkun realizzata. Se jkollna sehem mill-qawmien għall-ħajja, se nkunu mifdija anke fil-ġisem, mhux biss fir-ruħ.
Talba: “Mulej omnipotenti, x’tiġdid ħolistiku qed twettaq fina! Diġà għandna fina l-ħajja smewwitija, qabel ma naslu l-Ġenna. U allura l-Ġenna hi wirt riżervat għalina l-fidili tiegħek. Ħajr mill-qalb għal din l-assigurazzjoni, għax nifhmu illi aħna ssiġillati bl-Ispirtu tiegħek għal jum il-fidwa sħiħa tagħna. F’isem Ġesù, il-Garanti tagħna.”
Comments