“Appena Marija waslet fejn kien Ġesù u ratu, intefgħet ma’ saqajh u qaltlu, ‘Ja Sid, kieku kont hawn, ħija ma kienx imut.’ Kif raha tibki, u l-Lhud li akkumpanjawha jibku magħha, Ġesù kien ikkommovat qatigħ fl-ispirtu u ddisturba ruħu. ‘Fejn qegħidtuh?’ staqsa. Qalulu, ‘Ja Sid, ejja u ara.’ Ġesù beka. Għalhekk il-Lhud qalu, ‘Ara kemm kien iħobbu!’ Imma xi wħud minnhom irrimarkaw, ‘Ma setax dal-bniedem, li fetaħ għajnejn l-għami, jagħmel li anke dan ma jmutx?’” (Ġwanni 11:32-37).
Ġesù jħoss għalina. Xerred id-dmugħ għat-telfa ta’ ħabibu. Kien ikkommovat wisq. F’ċirkostanzi hekk iebsa talab lill-Missier. Dgħajjef fl-umanità; setgħan fid-divinità.
Min jaf x’ħass ukoll Lażżru kif ingħatatlu estensjoni ta’ għomru! U int, Kristjan, kif imissha ruħek titqanqal u tkun emozzjonat talli kont irxoxtat minn mewt fid-dnub għall-ħajja ta’ ġustizzja u mħabba. Swejt lis-Salvatur mhux biss id-dmugħ, mhux biss tnegħid u kommozzjoni. Swejtlu agunija, tortura lil hinn mill-ħsieb, sofferenzi lil hinn mill-espressjoni. Id-demm immakulat tiegħu xxerred minħabba fik, biex jipprokuralek il-ħajja eterna u jottieni s-salvazzjoni ta’ ruħek u ġismek.
Tista’ tirrifletti dwar din l-imħabba mingħajr ma timmedita fuq il-miżerja tiegħek? Tirrealizza kemm kapaċi jkunu iebsa qlubna? U kemm huma affettwati ftit bl-imħabba illi Alla waħdu seta’ jagħnina biha? Ejja mela, tħeġġeġ u indem. Hekk Bin Alla jkun jerġa’ iktar glorifikat fik. Stqarr il-bruda tiegħek. Dur lejh għal bidu ġdid. Mhux se jarmik; żgur mhux se jaqta’ qalbu minnek. Ladarba kisbek għalih innifsu, itemm xogħlu fik.
Talba: “Missier, l-għajta umli tiegħi hi biss, ‘Mulej, jien nemmen; għin in-nuqqas ta’ twemmin tiegħi.’ M’għadnix li kont, iżda żgurament għadni ma wasaltx. Għad fadal sfidi x’negħleb u muntanji x’nixxabbat. Titlaqnix waħdi, għax mingħajrek insofri biss disfatta. Nitolbok f’isem Ibnek Ġesù.”
Comments