“Imbierek ikun Alla u Missier Sidna Ġesù Kristu, Missier il-mogħdrijiet u Alla ta’ kull faraġ, li jfarraġna fl-afflizzjoni kollha tagħna, biex inkunu kapaċi nfarrġu ’l dawk fi kwalunkwe afflizzjoni bil-faraġ li bih aħna nfusna mfarrġin minn Alla. Għax bħalma joktru fina s-sofferenzi ta’ Kristu, hekk ukoll permezz ta’ Kristu joktor il-faraġ tagħna. Jekk aħna ttribulati, dan hu għall-faraġ u s-salvazzjoni tagħkom; jekk aħna mfarrġin, dan hu għall-faraġ tagħkom, li jipproduċi fikom saportu paċenzjuż tal-istess sofferenzi li aħna wkoll inbatu. U tamitna għalikom hi ferma, billi nafu illi bħalma intom partiċipanti fis-sofferenzi tagħna, hekk ukoll intom partiċipanti fil-faraġ tagħna” (2 Korintin 1:3-7).
Jekk jidhirlek li Alla qed jittardja bil-ħniniet tiegħu, iskot! Tikkritikax u tfexfixx! Ħaġa waħda agħmel: ibqa’ stennieh, għax ma jiddiżappuntax indefinittivament. L-orarju tiegħu hu differenti minn tiegħek, dak kollox. Appena tirrifletti tikka, tintebaħ illi t-tnikkir divin hu realment għall-vantaġġ tiegħek. Alla Missierna hu infinitament egħref minna lkoll!
Imħollijin waħidna, nagħmlu bħat-tfal: naqtgħu t-tuffieħa meta għadha ġandra; iżda meta tkun misjura, taqa’ bla intervent daparti tagħna. Tuffieħa misjura ttiegħem skwiżita u tagħmlilna l-ġid. Hekk ukoll il-ħniniet mis-sema huma skont l-orarju korrett: tiskurmentax ruħek. Anke jekk jidhirlek li tinsab fi kriżi serja: itfa’ l-hemm tiegħek fuqu. Wiegħed li jindokrak.
Mill-bqija, gwaj għalina jekk nabbużaw mill-ħniena divina, li hi tagħna frott is-sagrifiċċju li wettaq Kristu għan-nom tagħna. Hija ispirazzjoni satanika ngħidu, “Nidinbu, għax Alla jaħfrilna.” Min joffendi ’l Alla proprjament għax jemmen fil-ħniena t’Alla, bla ma jqis x’sewa lil Ibnu biex qalgħalna l-ħniena, ultimament jirċievi ġudizzju mingħajr ħniena. Il-ħniena mhijiex għal dawk li jidinbu bla ma jibżgħu, imma għal dawk li jibżgħu illi jidinbu.
Lill-fidil, il-ħniniet jumiljawh. Lill-midneb jagħmluh kburi, għax konsistentement jaqleb il-barkiet t’Alla f’saħta għalih innifsu, sakemm finalment jitkisser bla fejqan. Mingħajr fidi m’aħniex kompetenti biex nixtiequ l-ħniena. Mingħajr umiltà m’aħniex kompetenti biex nirċevuha. Mingħajr affezzjoni m’aħniex lesti biex nivvalutawha. Mingħajr sinċerità m’aħniex kwalifikati biex napprezzawha u napprofittaw minnha. Il-ħniniet t’Alla huma daqstant kalamiti li jattiraw lejn il-Ġenna, jew inkella toqol li jgħarraq lir-reprobat fit-telfien.
Meta Thomas Hooker kien fuq is-sodda tal-mewt, ħabibu qallu, “Ħija, dalwaqt tirċievi l-premju tat-taħbit tiegħek.” Il-moribond wieġbu, “Le, ħabib. Aktarx, dalwaqt se nirċievi ħniena.”
Talba: “Mulej, int iżżurna kull filgħodu bil-ħniniet tiegħek, u ġġeddidhomlna fil-fedeltà tiegħek. Kieku mhux hekk aħna bla tama, imsakkrin fil-ħtija u l-kundanna. Grazzi talli ħriftilna u aċċettajtna kif aħna, iżda nithennew meta nafu li ma tridx tħallina kif aħna. Naddafna, saħħaħna; agħmilna fwieħa ħelwa għalik.”
Comments