“Imma issa intom imisskom tneħħu dawn il-ħwejjeġ kollha: ir-rabja, l-għadab, il-malizzja, l-ikkalunnjar u diskors oxxen minn ħalqkom. Tigdbux lil xulxin, ladarba nżajtu l-bniedem il-qadim bil-prattiċi ħżiena tiegħu, u lbistu l-ġdid, li qed jiġġedded fit-tagħrif veru skont l-immaġni ta’ min ħalqu – tiġdid fejn m’hemmx distinzjoni bejn Grieg u Lhudi, ċirkonċiżjoni u inċirkonċiżjoni, barbaru, Skita, ilsir jew liberu, iżda Kristu hu kollox u f’kulħadd. Mela, bħala l-magħżulin t’Alla, qaddisin u maħbubin, ilbsu sentimenti ta’ mogħdrija, benevolenza, umiltà, manswetudini u paċenzja. Issaportu ’l xulxin u aħfru ’l xulxin, jekk xi ħadd għandu lment kontra ħaddieħor; bħalma appuntu ħafrilkom is-Sid, hekk ukoll agħmlu intom. U fuq dawn il-virtujiet kollha ilbsu l-imħabba, li hi r-rabta tal-armonija perfetta” (Kolossin 3:8-14).
Il-karattru diffiċilment jinbidel, u bil-mod – iżda jinbidel, bil-perseveranza. Għax bħalma ħafna xita therri l-irħam, u ħafna rfis ta’ riġlejn jogħrof u jfannad iċ-ċanġatura, hekk il-vizzji jitmermru bl-applikazzjoni konsistenti tal-virtù.
Il-virtù ma jaffettwak xejn jekk sempliċement issellimlu, u anke tmil quddiemu, u mbagħad tkompli fi triqtek. Hu bidu tajjeb meta tagħmel it-tjieba, imma wisq aħjar meta tħobb it-tjieba. Bl-istess mod, tevita d-dnub hi korsa sensibbli, imma wisq aktar nobbli huwa meta tħobb il-virtù, għax il-virtù hu dak il-ġid perfett li jikkomplementa l-ħajja hienja, l-unika ħaġa immortali li tappartieni għall-mortalità. Hija teżorerija ta’ tagħrif meta tifhem illi l-virtù waħdu jikkonduċi għall-kuntentizza, kemm hawn kif ukoll fid-dinja li għad trid tiġi.
Bla tlaqliq nammettu, illi l-perseveranza ma tiġix mill-ħila tagħna, frattant tiġi fil-ħila tagħna, skont il-ħidma misterjuża tal-Ispirtu s-Santu fina. Qajl qajl il-midneb li qed jafda fi Kristu jinbidel fix-xbieha tiegħu. It-trasformazzjoni hi meraviljuża. Minn dudu jsir farfett! Dan jgħodd ukoll għall-karriera tagħna. Xi trid tilħaq? Max-xewqa tiegħek ħallat id-dedikazzjoni, it-taħriġ u l-perseveranza.
Soċjetà missjonarja darba kitbet lil David Livingstone fiċ-ċentru tal-Afrika. Staqsietu: “Sibt xi triq tajba li tagħti għal fejn tinsab int? Jekk iva, lesti nibgħatulek xi rġiel oħra biex jagħtuk daqqa t’id.” Livingstone kiteb lura: “Jekk għandkom irġiel lesti jingħaqdu miegħi biss jekk ikunu jafu li hemm triq tajba, allura ma rridhomx. Irrid irġiel li lesti jiġu anke jekk m’hemmx triq.”
Talba: “Nammettu, Missier, illi fejn tidħol il-qdusija tagħna sikwit nippretendu li nsibu s-sodda mifruxa. M’aħniex lesti nxammru l-kmiem u naqbdu l-għodda. Aħfrilna dan l-għażż spiritwali; ikkoreġielna l-attitudni tagħna. Saħħaħna bl-Ispirtu tiegħek biex kuljum ninżgħu l-bniedem qadim u nilbsu l-ġdid; immewtu d-dnub fina filwaqt li nimmiraw lejn il-virtù.”
Comments