“Imma kif ra ħafna mill-Fariżej u s-Sadduċej ġejjin għall-magħmudija tiegħu, qalilhom, ‘Ja nisel il-lifgħat! Min wissiekom biex taħarbu mir-rabja li ġejja? Ipproduċu mela frott denju tal-indiema, u tissupponux li tistgħu tgħidu fikom infuskom, “Bħala missier għandna ’l Abraħam,” għax ngħidilkom, Alla kapaċi minn dal-ħaġar iqajjem tfal għal Abraħam. Il-mannara diġà tqiegħdet ma’ għerq is-siġar; għalhekk kull siġra li ma tipproduċix frott tajjeb tinqata’ u tinxteħet fin-nar’” (Mattew 3:7-10).
M’aħniex sagramentalisti, u bir-raġun! Hemm post xieraq għall-magħmudija, iżda ma nemmnux illi hi indispensabbli għas-salvazzjoni. Għall-kuntrarju, wieħed jista’ jmur l-Infern bl-ilma tal-magħmudija fuq wiċċu.
Il-magħmudija hi importanti u neċessarja, iżda mhux biex biha titwieled mill-ġdid. Le, huwa ovvju illi l-Ispirtu s-Santu jopera kif, meta, fejn u fuq min irid hu. L-Ispirtu s-Santu hu mxebbah mar-riħ li jonfoħ. Għalkemm nisimgħu ħossu, ma nafux mnejn hu jew fejn hu sejjer. Appena wieħed jingħata ħajja ġdida fi Kristu, wara li jsir ħlejqa ġdida fih, imbagħad hu kandidat xieraq għall-magħmudija. Bħalma ċ-ċirkonċiżjoni kienet għall-poplu antik t’Alla l-għelm tal-ġustizzja tagħhom quddiemu, hekk il-magħmudija hi l-baġġ li l-fidil jappartieni għal Ġesù, li b’demmu għandu l-maħfra. Hu d-demm tal-Ħaruf li jnaddafna minn ħtijietna, mhux l-ilma tal-battisteru.
Qabel ma s-saltna tal-grazzja tkun stabbilita fi qlubna, l-ordinanzi ma jippurifikawniex, iżda aktarx inħammġuhom. Imqar l-eżerċizzji reliġjużi tal-persuna bla grazzja jsiru dnub. “Il-Mulej jistkerrah is-sagrifiċċju tal-ħżiena, iżda t-talb tan-nies retti l-għaxqa tiegħu” (Proverbji 15:8). Qabel ma r-ruħ tiddawwar lejn Kristu, tinsab f’kondizzjoni patetika tabilħaqq! Sew jekk it-tali persuna tersaq jew tastjieni mill-ordinanza, tidneb. Jekk jibqa’ bogħod mill-ordinanza, ikun qed jistmerra; jekk jirċeviha, iniġġisha.
L-Ikla tal-Mulej, magħrufa fostna wkoll bħala l-Komunjoni, tqanqal l-aptit spiritwali fir-ruħ riġenerata. Aktar ma l-qaddisin iduqu mill-Mulej fl-ordinanza, aktar xewqathom huma mqanqla u misnuna. Iżjed jixxenqu għalih. Ftit ħniena tista’ ssalva r-ruħ, imma jrid ikun ammont kbir ta’ ħniena biex jissodisfa r-ruħ. Ir-ruħ imġewħa tagħraf illi l-manna tal-Ispirtu normalment taqa’ man-nida tal-ordinanzi. Alla, li joħloq l-għatx fina, jissodisfahulna bil-mezzi provduti minnu stess.
Is-sagramenti ma jagħtux il-ħajja, iżda jsostnuha; ikabbru dak diġà mibdi mill-Ispirtu. Fil-Komunjoni, idejn dgħajfa u rkopptejn imriegħda jistgħu jissaħħu, qlub imtertqa jistgħu jitfarrġu, erwieħ fid-dubju jistgħu jirriżolvu l-indeċiżjonijiet tagħhom, erwieħ imtajra jsibu stabbiltà, u erwieħ mgħaxxa jitwieżnu. Iżda erwieħ mejta ma jiggwadanjaw xejn minnhom, xejn affattu. Dawn il-ħwejjeġ qaddisa jmisshom ikunu amministrati biss lil dawk denji u kwalifikati għalihom, skont ir-regola tal-vanġelu.
L-imsieħba fil-patt m’Alla għandhom jersqu preparati. Nilbsu sew meta nkunu mistiedna għal xi pranzu mal-kbarat f’xi okkażżjoni speċjali. Hekk imissna naħsbu dwarna nfusna, meta nkunu mistiedna għall-Ikla tal-Ħaruf. Inħejju rwieħna b’meditazzjoni qaddisa u konsiderazzjoni f’qalbna u fil-kuxjenza.
Talba: “Mulej Ġesù Kristu, aħna nappartienu għalik, midfunin miegħek bil-magħmudija fil-mewt. Bħalma tqajjimt minn bejn l-imwiet bil-glorja tal-Missier, agħtina illi aħna nimxu wkoll miegħek fit-tiġdid tal-ħajja. Għallimna ngħaddu minn jum għal jum, minn siegħa għall-oħra, bit-tifkira għażiża tiegħek fi qlubna. Ammen.”
Comments