“Għaldaqstant, billi tneħħu l-falsità, ‘Tkellmu l-verità, kull wieħed minnkom, mal-proxxmu tiegħu,’ għax aħna membri ta’ xulxin. ‘Irrabjaw u frattant tidinbux.’ Tħallux ix-xemx tgħarrab fuq il-korla tagħkom, lanqas tagħtu opportunità lix-xitan. Ħalli min seraq ma jisraqx iżjed, imma aktarx għandu jitħabat, billi jaħdem onestament b’idejh stess, sabiex ikollu x’jaqsam ma’ min hu fil-bżonn. Ħa ma tipproċiedi l-ebda kelma mħassra minn fommkom, iżda biss kwalunkwe kelma tajba għall-edifikazzjoni ta’ ħaddieħor, skont kif tirrekjiedi l-okkażżjoni, sabiex tagħti grazzja ’l dawk li jisimgħuha. U tnikktux lill-Ispirtu s-Santu t’Alla, li bih kontu ssiġillati għal jum il-fidwa. Ħa jitwarrab minnkom kull imrar, għadab u rabja, għajjat klamoruż u diffamazzjoni, ma’ kull forma ta’ malizzja. Kunu benevolenti ma’ xulxin, kumpassjonali, u aħfru ’l xulxin, bħalma Alla ħafer lilkom fi Kristu” (Efesin 4:25-32).
Inża’ u ilbes, imma mhux fis-sens li l-ewwel tinża’ għalkollox biex imbagħad, bħala t-tieni pass, tilbes il-ġdid. Le: il-ġdid jimbotta ’l barra l-qadim, bħal meta tiftaħ tieqa: ir-rieħa tal-għeluq toħroġ għax tkun qed tiġi mibdula bl-arja friska. Waħda tkeċċi ’l oħra.
Kif taħdem did-dinamika prattikament? L-appostlu Pawlu jagħtina diversi eżempji:
1. Minflok gideb (il-qadim), trawwem fil-verità, tkellem dejjem id-dritt.
2. Minflok korla inġusta (il-qadim), tratta l-kawżi tar-rabja immedjatament, mingħajr ma tħalli l-problemi fir-relazzjoni tiegħek jinġemgħu. Bir-raġun, għax jekk ma tagħmilx hekk, tkun qed tagħti l-opportunità lix-xitan biex iqabbad dirfejh.
3. Minflok serq (il-qadim), involvi ruħek f’ħidma onesta biex tipprovdi għalik innifsek u saħansitra tibda tkun ġeneruż ma’ ħaddieħor.
4. Minflok diskors korrott (il-qadim), fittex li kliemek ikun neċessarju, mhux superfluwu, dejjem għall-edifikazzjoni, biex jgħin jew jagħti grazzja lis-semmiegħa tiegħek.
5. Minflok komportament immorali, speċjalment fl-ilsien u l-attitudni (il-qadim), ikkoltiva fik atteġġjament ta’ tenerezza u ġentilezza, u maħfra ġenwina; u bir-raġun, għax int diġà maħfur.
It-tiġdid tal-Kristjan beda deċiżvament meta kkonverta, meta emmen l-evanġelju; jitkompla matul ħajjitna kollha.
Talba: “Bil-mod misterjuż u omnipotenti tiegħek, Spirtu s-Santu, bdejt ħidma tajba fija.Wellidtni mill-ġdid; għamiltni ħaj għal Alla. Nitolbok issa biex tmantni din l-attività ta’ taqdis fija; nixtieq nikkoopera miegħek, u mhux nirreżistik. Imlini bik sabiex ir-rinovazzjoni morali u spiritwali tiegħi tibqa’ sseħħ b’suċċess, għall-glorja tas-Salvatur tiegħi, Ġesù Kristu.”
Comments